ក្រុមហ៊ុន ម៉ាក់អេម៉ា Co,.Ltd ចូលរួមឧបត្ថម្ភ ជែល និងស្ព្រាយលាងដៃ ជូនលោកស្រីវេជ្ជ. ឱ វណ្ណឌីន អ្នកនាំពាក្យក្រសួងសុខាភិបាលកម្ពុជា ដើម្បីប្រើប្រាស់ប្រឆាំងនឹងជំងឺកូវីដ-១៩!

ភ្នំពេញ៖ ដើម្បីចូលរួមចំណែកជាមួយរាជរដ្ឋាភិបាលក្នុងការប្រយុទ្ធប្រឆាំងនឹងជំងឺកូវីដ-១៩ ដែលកំពុងរាលដាលនៅក្នុងប្រទេសកម្ពុជា ក្រុមហ៊ុន ម៉ាក់អេម៉ា Co,.Ltd ដែលជាក្រុមហ៊ុននាំចូល ជែល និងស្ព្រាយលាងដៃ ម៉ាក clear 19 ពីក្រៅប្រទេសមកលក់នៅកម្ពុជា បានចូលរួមឧបត្ថម្ភ ជែល និងស្ព្រាយលាងដៃ ជូនលោកស្រី ឱ វ៉ាន់ឌីន អ្នកនាំពាក្យក្រសួងសុខាភិបាលកម្ពុជា ដើម្បីប្រើប្រាស់ក្នុងយុទ្ធនាការប្រយុទ្ធប្រឆាំងនឹងជំងឺកូវីដ-១៩។

ពីធីប្រគល់ និងទទួល បានធ្វើឡើងនាព្រឹកថ្ងៃទី៩ ខែមេសា ឆ្នាំ២០២០ នេះ នៅទីស្តីការក្រសួងសុខាភិបាលក្រោម អធិបតីភាពលោកស្រី ឱ វ៉ាន់ឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល និងតំណាងក្រុមហ៊ុន ម៉ាក់អេម៉ា Co,.Ltd ដែលមានដូចជា៖
១. លោកស្រី ឈឹម សុភ័ណ្ឌ
 ២. លោក ឡុង មករា
 ៣. លោក ជា និស្ស័យ
 ៤. លោក សៀវ លាង។

នាឱកាសនោះលោកស្រី វេជ្ជ. ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលកម្ពុជា បានមានប្រសាសន៍ដោយបានថ្លែងនូវការអរគុណយ៉ាងជ្រាលជ្រៅចំពោះក្រុមហ៊ុន ម៉ាក់អេម៉ា Co,.Ltd ដែលបានឧបត្ថម្ភ ជែល និងស្ព្រាយលាងដៃ ម៉ាក clear 19 ដល់ក្រសួង ដើម្បីចូលរួម និងគាំទ្រការងារប្រយុទ្ធប្រឆាំងនឹងការរីករាលដាលនៃជំងឺកូវីដ-១៩។ លោកស្រីបន្តថា សកម្មភាពទាំងនេះពិតជាសរបញ្ជាក់ឲ្យឃើញពីកាយវិការប្រកបដោយសប្បុរស និងជាការរួមចំណែកមិនអាចខ្វះបានពីផ្នែកឯកជន នៅក្នុងការចូលរួមដោះស្រាយបញ្ហាប្រឈមរួមដែលប្រទេសជាតិយើងកំពុងជួបប្រទះនាពេលបច្ចុប្បន្នគឺជំងឺកូវីដ-១៩ ហើយ ជែល និងស្ព្រាយលាងដៃ ទាំងនេះ នឹងយកទៅប្រើប្រាស់ក្នុងសកម្មភាពបង្ការទប់ស្កាត់ការឆ្លងរាលដាលនៃជំងឺកូវីដ-១៩។

តំណាងក្រុមហ៊ុន ម៉ាក់អេម៉ា Co,.Ltd បានថ្លែងអំណរគុណ គោរពកោតសរសើរខ្ពស់ចំពោះប្រមុខរាជរដ្ឋាភិបាលកម្ពុជា និងថ្នាក់ដឹកនាំក្រសួងសុខាភិបាល និងលោកស្រី ឱ វ៉ាន់ឌីន ព្រមទាំងមន្ត្រីរាជការ ដែលបានខិតខំបំពេញភារកិច្ចមិនខ្លាចនឿយហត់ ពិសេសនៅក្នុងការចូលរួមទប់ស្កាត់ការរីករាលដាលជំងឺកូវីដ-១៩ ដើម្បីការពារសេចក្ដីសុខ និងសុវត្ថិភាពជូនប្រជាពលរដ្ឋ។ តំណាងក្រុមហ៊ុនបន្តថា ទោះបីជាអំណោយ ដែលក្រុមហ៊ុនប្រគល់ជូននៅពេលនេះមានចំនួនតិចតួចក្តី តែក៏អាចចូលរួមទប់ស្កាត់ការរីករាលដាលជំងឺកូវីដ-១៩ បានមួយរយៈពេលផងដែរ។

សូមបញ្ជាក់ថា គិតត្រឹមម៉ោង៩ព្រឹក ថ្ងៃទី៩ មេសា ២០២០ ក្រសួងសុខាភិបាលបានប្រកាសរកឃើញអ្នកជំងឺ COVID-19 ១ករណីថ្មី (ជនជាតិវៀតណាមប៉ះពាល់ផ្ទាល់ជាមួយអ្នកជំងឺវិជ្ជមានកូវីដ១៩) ជាសរុបប្រទេសយើងមានចំនួន ១១៩ ករណី និងបានព្យាបាលជាសះស្បើយចំនួន ៤ករណីទៀត សរុប ៧២នាក់ ស្លាប់គ្មាន។ ក្រសួងបញ្ជាក់ថាគិតមកដល់ពេលនេះ ក្រសួងពុំទាន់រកឃើញភ័ស្តុតាងបញ្ជាក់ថាមានការឆ្លងក្នុងសហគមន៍នៅឡើយទេ តែលទ្ធភាពនឹងអាចកើតមានឡើង ដូច្នេះសូមបងប្អូនបន្តប្រយ័ត្នជាប់ជានិច្ច ដោយធ្វើអនាម័យនៅឃ្លាតឆ្ងាយពីគ្នាមិនចេញក្រៅផ្ទះបើមិនចាំបាច់។ ព័ត៌មានបន្ថែមសូមទាក់ទងលេខ១១៥៕