សាំសុងសម្រេច​បិទរោងចក្រនៅសហរដ្ឋអាមេរិក ក្រោយរកឃើញបុគ្គលិកពីរនាក់ឆ្លងវីរុសកូវីត-១៩

បរទេស៖ ក្រុមហ៊ុនអេឡិចត្រូនិកសាំសុងបាននិយាយ​នៅថ្ងៃសុក្រនេះថា ខ្លួនបានបិទរោងចក្រផលិតឧបករណ៍ប្រើប្រាស់ក្នុងផ្ទះ​នៅសហរដ្ឋអាមេរិកបណ្តោះអាសន្ន បន្ទាប់​ពីរកឃើញបុគ្គលិកដែលធ្វើការនៅក្នុងរោងចក្រចំនួនពីរនាក់បានឆ្លងវីរុសកូវីត-១៩។

ក្រុមហ៊ុនបច្ចេកវិទ្យាយក្សរបស់កូរ៉េខាងត្បូងមួយនេះបាននិយាយថា រោងចក្ររបស់ខ្លួនដែលមានទីតាំងនៅតំបន់ Newberry County រដ្ឋ South Carolina កំពុងត្រូវបានសម្អាត និងរៀបចំឱ្យមាន​អនាម័យ​ ហើយនឹងចាប់ផ្តើមបើកដំណើរការឡើងវិញនៅថ្ងៃច័ន្ទ។

សូមជម្រាបដែរថា បើគិតមកដល់ថ្ងៃនេះ ចំនួនអ្នកឆ្លងវីរុសកូវីត-១៩ នៅសហរដ្ឋអាមេរិកបានកើនឡើងដល់ ២៤៥,០៦៦ នាក់ ហើយក្នុងនោះមានអ្នកជំងឺ ៦,០៧៥ នាក់បានស្លាប់បាត់បង់ជីវិត ខណៈអ្នកជំងឺ ១០,៤០៣ នាក់ផ្សេងទៀតបានទទួលការព្យាបាលជាសះស្បើយ៕