កំណាព្យដោយប្រិយមិត្ត Thol Toma ៖ ឆ្កែ និង កុក

ឆ្កែ និង កុក

(បទ ពាក្យប្រាំពីរ)

១. សូមថ្លែងចែងពីកុកនិងឆ្កែ ប្រាប់ដល់កូនខ្មែរពាក្យទូន្មាន

រៀបជាទំនុកទុកជាស្ពាន ធ្វើជាមេរៀនក្រើនរំលឹក ។

២. នៅក្នុងព្រៃជ្រៅឆ្កែនិងកុក ចងមិត្តបានសុខល្អពន្លឹក

រកស៊ីដោយខ្លួនសែនសមឬក រស់ដោយមិននឹកពាក្យចងពារ ។

៣. ថ្ងៃបាក់រសៀលឆ្កែស្រែកផ្តាំ នែបងកុកចាំទៅជាគ្នា

ទំនុំយើងក្បែរមិនកំព្រារ នៅជិតជុំជាមិនឯកោ ។

៤. កុកស្រែកថាអឺណាបងវា បានបងជាគ្នាជាមេត្តា

ខ្ញុំបានកក់ក្តៅក្នុងឳរ៉ា ស្ងប់ក្នុងចិន្តាល្អប្រពៃ ។

៥. កុកនិងសត្វឆ្កែសាងមិត្តភាព ដ៏រាបរាងរាបកាលយូអី

រស់ក្នុងរូងភ្នំឈើក្នុងព្រៃ មានម្ហូបចែកឆីមិនដែលលាក់។

៦. ខុសអីថ្ងៃមួយឆ្កែបានឆី រកគិតលកលៃហៅមិនលាក់

អញ្ចើញមិត្តចាស់ភ្ញៀវវលក្ខណ៏ ឆីម្ហូបត្រជាក់ជាអាហារ ។

៧. ពេលកុកមកដល់ស្រងាកចិត្ត ក្តុកក្តួលឃើញត្បិតម្ហូបត្រៀនត្រា

សុទ្ធដាក់ចានទាបរាបដីណា កុកគិតពិចារឆីម្តេចបាន?

៨. ឆ្កែឆីអាហារដោយចំអក សំឡឹងសំឡកកុកក្បែរប្រាណ

រីកុកក៏ដឹងរឿងប៉ុន្មាន កើតខឹងនឹងស្មានហេតុដូចច្នេះ ។

៩. ពិធីផ្ទះឆ្កែបានបញ្ចប់ កុកក៏ត្រលប់ចាញ់តំរិះ

រកកលវិធីអស់ចំណេះ ច្នោះម៉្លេះសមអញធ្វើតាមវា ។

១០. គិតហើយក្តៅផ្សាពេញដងប្រាណ ចិត្តមិត្តសាម៉ានធ្វើវេទនា

ម៉្លេះអញកុំទៅអាណិតវា ធ្វើឲ្យរួចគ្នាទើបស្មើរភាព ។

១១. ពិធីផ្ទះកុកបានមកដល់ កុកត្រៀមល្បិចកលតាំងរាងរាប

អញ្ចើញមិត្តឆ្កែឆីម្ហូបលាភ ដាក់និងក្អមទាបតាមត្រាប់ឆ្កែ ។

១២. ថ្វីឆ្កែឃើញច្នោះអស់សង្ឈឹម មុនមិនញញឹមភ័ក្រ្តប្រួលប្រែ

មិននឹកស្មានកុកមិត្តនៅក្បែរ យកល្បិចសម្រែវិលរកខ្លួន ។

១៣. ក្អមវែងអញឆីវាម្តេចបាន? បើដាក់និងចានទើបសមសួន

ម៉្លេះនិងបានឆីអំណោយខ្លួន ដែលជាចំនួនរៀបពោរពាស ។

១៤. នឹកមិនអស់់ចិត្តដណ្តឹងសួរ នូវមួយសំនួរមិនវៀងចៀស

ម្តេចសមមិត្តធ្វើឲ្យវិនាស ភក្តីនិរាស្រ្តឥតរសាយ ។

១៥. កុកឆ្លើយសំនួរអើនែមិត្ត តើបានពិនិត្យដើមអន្តរាយ?

អ្នកណាផ្តើមមុនសូមបរិយាយ អញក៏សែនស្តាយរឿងអំបាល ។

១៦. ម្ហូបដាក់ចានទាបអញចាប់ឆី លុះជ្រុះត្រីអីលើដំរាល

ឯងសើចដឺអញឲ្យឈឺក្បាល អញខ្មាស់ដំណាលរឿងកាលមុន ។

១៧. ឆ្កែពោលថាអើអញធ្វើលែង ម្តេចមកប្រជែងធ្វើទារុណ្ឌ

ដាក់អញដូចច្នេះរកចង់គ្រុន កើតខ្យល់ព្រោះមុនមិនបានឆី ។

១៨. កុកពោលតបវិញជាប្រញាប់ ពីមុនស្ទើរស្លាប់អត់ចំណី

ជប់លាងផ្ទះឯងមិនបានឆី បានគ្រួសពីបីជាសម្រន់ ។

១៩. ច្នេះបើដឹងច្នោះយល់ហើយរ៉ា គ្រួសនៅគុម្ពផ្កាដាក់ឲ្យស្រន់

ល៎តែកើតខ្យល់កូនស្លោស្លន់ ភ័យរត់ទៅបន់ព្រះឲ្យជួយ ។

២០. ឆ្កែលឺពីកុកខឹងពេកពន់ មិនគួរណាធ្ងន់ជួបទុក្ខព្រួយ

ទំពារលេបគ្រួសចូលម្តងមួយ ស្ទើរតែរលួយពោះវៀនជ្រុះ ។

២១. ពិធីផ្ទះកុកក៏បញ្ចប់ ឆ្កែស្ទើរសន្លប់ខំប្រឹងស្ទុស

ចរដើរឲ្យដល់ព្រៃជិតនោះ ថ្លើមស្ទើររលុះធ្លាក់ដល់ដី ។

២២. ចាប់តាំងពីនោះតរៀងមក ឆ្កែកុកលែងមកជ្រករួមព្រៃ

ឆ្កែកុករស់នៅដោយទីទៃ រកអាហារឆីដោយឡែកខ្លួន ។

២៣. កុកឆ្កែលែងមិត្តព្រោះកំហុស ដែលខ្លួនសាងខុសព្រោះគុំគួន

គិតពីសងសឹកមិនខំពួន សាមគ្គីរលួនឲ្យសុខកាយ ។

២៤. បើកុកគិតថាមិត្តល្បងខ្លួន​ នោះមិនជាប់ជួនឲ្យអន្តរាយ

មិត្តល្អធា្លប់រស់សើចក្បែរកាយ គួរឲ្យសែនស្តាយព្រោះចងពារ ។

២៥. ចំនែកឆ្កែវិញមិនគួរល្បង ល្បែងដែលរមែងឲ្យពុំជា

គួរណាស់រៀបចំតម្រូវគ្នា នោះគ្មានរោគានាំវិនាស ។

By Thol Toma

Khmerload