កំណាព្យដោយប្រិយមិត្ត ម៉េងលី រតនពិសិដ្ឋ ៖ កុំឆាប់ជឿពេក

កុំឆាប់ជឿពេក

(បទកាកគតិ)

និពន្ធដោយៈ ម៉េងលី រតនពិសិដ្ឋ

រលកបោកច្រាំង លឺសូរផាំងៗ ច្រាំងគង់របេះ

ធ្លាក់ចុះបំណែក រហែកស្រាំប្រេះ អោយវារបេះ

ធ្លាក់ចូលទឹកបាន។

ប្រៀបដូចសម្ដី គេនិយាយស្ដី លេបខាយរុញច្រាន

ពេញដោយល្បិចកល ពឹសពុលសាមាន្យ អោយយើងលង់ប្រាណ

បាក់ចិត្តលង់ស្នេហ៍។

ទៅនឹងទង្វើ ដែលគេបានធ្វើ ចូលមកស្និទ្ធក្បែរ

បញ្ជាក់ដូងចិត្ត ថាពិតស្មោះស្នេហ៍ ស្រលាញ់មិនប្រែ

លុះត្រាក្សិណក្ស័យ។

បងស្ម័គ្រអូនស្មោះ អូនស្នេហ៍បងអស់ ពីដូងហឬទ័យ

សច្ចាស្បថស្បែ ថាស្នេហ៍តែថ្លៃ មាននភាល័យ

សាក្សីស្នេហ៍យើង។

មិនយូរប៉ុន្មាន ស្នេហ៍ស្មោះក្នុងប្រាណ ក៏ត្រូវរលើង

ដោយចំហាយក្បត់ កំណត់ផ្ទុះឡើង ដូចភ្នក់ចំបើង

ប៉ើងពេលត្រូវខ្យល់។

នឹងហើយស្នេហា នាសម័យកាល តាមរលកខ្យល់

មិនទាន់ស្គាល់ចិត្ត ស្នេហ៍ស្និទ្ធដិតដល់ បែរជាកាត់យល់

ថាគេស្មោះខ្លួន។

កុំឆាប់ជឿពេក ប្រយ័ត្នទឹកភ្នែក ហូរជ្រែករុកគួន

ស្រោចស្របផ្ទៃមុខ ជួបទុក្ខអង្រួន ដូចជាក្រមួន

ត្រូវកំដៅថ្ងៃ។

គួរគិតអោយដល់ វិភាគអោយយល់ មុនធ្វើអ្វីៗ

នោះទើបសុភ- មង្គលថ្លាថ្លៃ កើតមានក្នុងន័យ

ល្អប្រសើរណា។

​ ​​កោះធំ ថ្ងៃទី០៩ ខែ កក្ដដា ឆ្នាំ២០១២