ខេត្តត្បូងឃ្មុំ ៖ រថយន្តធុនធំ១ គ្រឿងម៉ាកដឺវូ ពណ៌ខៀវ ពាក់ស្លាកលេខ ភ្នំពេញ3B-6322 បែកកង់ បានឈប់ចតនៅលើ ផ្លូវជាតិលេខ៧ ត្រង់ភូមិវាលកណ្តៀង ឃុំជុប ស្រុកត្បូងឃ្មុំ ត្រូវម៉ូតូវ៉េវ ពណ៌ក្រហម ១គ្រឿង ជិះទៅបុកគូទរថយន្ត ពីក្រោយពេញទំហឹង ។ ហេតុការណ៏នេះកើតឡើង នៅម៉ោង៨ និង៤០នាទី យប់ថ្ងៃទី២៣ មេសា ២០១៥ បណ្តាលឲ្យអ្នកបើកម៉ូតូ រងរបួសធ្ងន់ធ្ងរ ។ ចំណែកបុរសម្នាក់ដែលមក ឈរមើលហេតុការណ៏នេះ ក៏ត្រូវរថយន្តវីហ្គូ បុករបួសធ្ងន់ធ្ងរដែរ ត្រូវបានគេបញ្ជូនទៅ សង្គ្រោះនៅមន្ទីរពេទ្យ ខេត្តកំពង់ចាម ក្រោយមកក៏ស្លាប់ទាំង២ នាក់តែម្តង ។
លោកវរសេនីយ៏ត្រី សូ សារ៉ាត់ នាយការិយាល័យ ចរាចរណ៍ផ្លូវគោកខេត្តប្រាប់ ឲ្យដឹងថា ដំបូងគេឃើញរថយន្តខាងលើ បានបែកកង់ខាងក្រោយ ហើយត្រូវបានអ្នកបើកបររថយន្ត មិនស្គាល់អត្តសញ្ញាណ បានឈប់អែបលើ កំណាត់ផ្លូវជាតិលេខ៧ ដោយគ្មានភ្លើងបំភ្លឺ និងថែមទាំងមិនដាក់ ស្លាកសញ្ញា ដើម្បីឲ្យអ្នកដំណើរមក ពីក្រោយបានឃើញនោះទេ ។ លោកវរសេនីយ៏ ត្រីប្រាប់បន្តថា លុះនៅម៉ោង៨ និង៤០ នាទីយប់ថ្ងៃទី២៣ មេសា ក៏ស្រាប់តែមាន យុវជនម្នាក់ ឈ្មោះយាន ឌីណា អាយុ ២២ឆ្នាំ នៅភូមិជុបទី១ ឃុំជុប ស្រុកត្បូងឃ្មុំ បានជិះម៉ូតូដោយប្រើប្រាស់ ល្បឿនលឿនផងនោះ ក៏ទៅបុកគូទរថយន្ត ដឹកទំនិញដែលឈប់ពេញទំហឹង ។
បណ្តាលឲ្យ ដួលចូលក្រោមរថយន្ត រងរបួសធ្ងន់ធ្ងរ បង្កការភ្ញាក់ផ្អើល ដល់ប្រជាពលរដ្ឋក្បែរនោះ ក៏បាននាំគ្នាមកមើល ជាបន្តបន្ទាប់ ជាមួយ គ្នានោះអ្នកភូមិ ដែលមកមើលឈ្មោះលី សូណាង អាយុ៥២ឆ្នាំ នៅភូមិវាលកណ្តៀង ឃុំជុប កំពុងតែឈរមើលមិន បានប្រុងប្រយ័ត្ន ស្រាប់តែមាន រថយន្តម៉ាកវីហ្គូ ១គ្រឿង បានបើកមកបុក បណ្តាលឲ្យរងរបួសធ្ងន់ធ្ងរ ម្នាក់ទៀតក្រោយបុក រថយន្តបើករត់គេច បាត់ស្រមោល រីឯជនរងគ្រោះទាំង២នាក់ ត្រូវបានបញ្ជូនទៅសង្គ្រោះ នៅមន្ទីរពេទ្យខេត្តកំពង់ចាម ហើយក៏ស្លាប់ទាំង ២នាក់តែម្តង ។
លោកបញ្ជាក់ថា សពទាំង២នាក់ ត្រូវបានសាច់ញាតិដឹកត្រឡប់ យកទៅធ្វើបុណ្យរាងៗខ្លួន ចំណែករថយន្តធំ ដឹកទំនិញនោះ ត្រូវបានជំនាញ នាំយកមករក្សាទុក ជាបណ្តោះអាសន្ន នៅអធិការដ្ឋាននគរបាល ស្រុកត្បូងឃ្មុំ ដើម្បីដោះស្រាយតាមច្បាប់ ហើយក៏មិនទាន់ដឹងថា រថយន្តធំនោះ ជារបស់ថៅកែណា មួយនៅឡើយ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
