ផឹកស៊ី​ឆ្លង​ឆ្នាំ​​ត្រឡប់​ទៅ​ផ្ទះ​រំលង​អធ្រា​ត្រ បុក​គូទ​រថយន្ត​​ឈប់​ស្ងៀម​ស្លាប់​៣​នាក់

ខេត្តបាត់ដំបង ៖ យុវជន៣នាក់ ទំនងទើបចេញ ពីកន្លែងផឹកស៊ី បានបើករថយន្ត ទៅបុកគូទរថយន្ត ដឹកទឹកកក ដែលឈប់ស្ងៀម នៅលើចិញ្ចើមថ្នល់ ជាតិលេខ៥ បណ្ដាលឲ្យ ស្លាប់ទាំង៣នាក់ កាលពីវេលា ម៉ោង៣ រំលងអធ្រាត្រ ឈានចូល ថ្ងៃទី១៧ មេសា ត្រង់ចំនុច ភូមិកកោះ ឃុំអូរតាគី ស្រុកថ្មគោល ។

សមត្ថកិច្ច បានប្រាប់ថា រថយន្តម៉ាកនីស្សាន់ ពណ៏ក្រហម ជិះគ្នា៣នាក់ ដែលទំនងទើបចេញ ពីកន្លែងផឹកស៊ី ឬចេញពីក្លិប ខារ៉ាអូខេណាមួយ នៅក្នុងក្រុងបាត់ដំបង ហើយបើកត្រឡប់ ទៅផ្ទះវិញ នៅឯស្រុកថ្មគោល ក៏ជួបគ្រោះថ្នាក់ តែម្ដង ។

សមត្ថកិច្ចបន្តថា ពេលបើកដល់ចំនុចខាងលើ រថយន្តនីស្សាន់នោះ ក៏បុកគូទរថយន្ត ដឹកទឹកកក ពីក្រោយពេញទំហឹង បណ្ដាលឲ្យស្លាប់ ទាំង៣នាក់ កៀបជាប់ក្នុងរថយន្ត ។

សមត្ថកិច្ច បញ្ជាក់ថា រថយន្តដឹកទឹកកក របស់ក្រុមហ៊ុន «សេះហោះមានជ័យ» នោះខូច ហើយឈប់នៅលើ ចិញ្ចើមថ្នល់ ក្នុងទិសដៅ ពីកើតទៅលិច តែគ្មានស្លាកសញ្ញា ឬចំណាំងផ្លាត ឲ្យគេឃើញ ពេលយប់នោះទេ ។

អ្នកភូមិនៅក្បែរនោះ បានឲ្យដឹងដែរថា មិនមានអ្នកណា បានឃើញផ្ទាល់ភ្នែក នៅក្នុងហេតុការណ៏ នេះទេ តែគេបានឮសំឡេង បុកយ៉ាងខ្លាំង លុះអ្នកភូមិ នាំគ្នាទៅមើល ស្រាប់តែគេឃើញ រថយន្តតូចនោះ បានបុកចូលក្រោមគូទ រថយន្តដឹកទឹកកក ពីក្រោយ ។ គ្រានោះមានមនុស្ស៣នាក់ កៀបជាប់ នៅក្នុងរថយន្ត ស្ងាត់មាត់ឈឹង ពោរពេញទៅដោយ ឈាមជោកជាំ ក្នុងរថយន្ត ។ ប៉ុន្តែគេមិនអាច ជួយទាញមនុស្សចេញ ពីក្នុងរថយន្តបានទេ បានត្រឹមតែ រាយការណ៏ ប្រាប់សមត្ថកិច្ច តែប៉ុណ្ណោះ ៕