ថន លក្ខិណា ត្រៀមបង្ហាញ មុខនៅ លើកញ្ចក់ទូរទស្សន៍ ហង្សមាស

ភ្នំពេញ៖ តារាសម្ដែង និងជាពិធីការិនីដ៏ស្រស់សោភា កញ្ញា ថន លក្ខិណា ត្រូវបានគេមើលឃើញថា នៅតែរក្សាតំណែង ជាតារាសម្ដែង ស្រីលេចធ្លោរ ជួរមុខដដែល បើទោះជាមិនសូវល្បីល្បាញខ្លាំងក្លា ក្នុងការសម្ដែងដូចមុនក៏ដោយ ព្រោះមានអាជីពក្នុងការនិយាយស្ដីផង និងសម្ដែងដែល វាអាច យិតយោងគ្នាបាន មិនធ្វើឲ្យនាងស្ងប់ស្ងាត់។

ថ្មីៗនេះ ថន លក្ខិណា បានដើរលុកលុយ ស្ថានីយទូរទស្សន៍ថៃជាច្រើន ព្រោះត្រូវថតរឿង ជាមួយតារា សម្ដែង ប្រុសដ៏ល្បីរបស់ថៃ ដូចនេះ នាង ត្រូវទៅថតតាមទីតាំងដែលត្រូវថត ។ នេះជាឱកាស មួយ ដ៏មានន័យសម្រាប់ជីវិត ជាតារាសម្ដែងរបស់នាង ហើយត្រូវបានប្រទេស ជិតខាង ទទួលស្គាល់ ថាជាតារាសម្ដែងល្បីរបស់កម្ពុជា ។ ចំណែកឯការងារក្នុងស្រុកវិញ មានតែកម្មវិធីនៅ ទូរទស្សន៍ស៊ីធីអិន មួយ ប៉ុណ្ណោះ ដែលមានកម្មវិធី "ផ្ទះលោកតា" ជាកម្មវិធីមួយ ផ្ដល់ភាពសប្បាយរីករាយ ដល់អ្នកទស្សនា និងមានឈ្មោះល្បីគួរសម ។ ប៉ុន្តែ ថន លក្ខិណា មិនមែនបុគ្គលិកពេញសិទ្ធិរបស់ ស៊ីធីអិនទេ។

ថន លក្ខិណា មានសេរីភាពគ្រប់គ្រាន់ ក្នុងការជ្រើសរើស បានការងារគ្រប់ប្រភេទ និងមិនប្រកាន់ថា ស្ថានីយណាទេ ឲ្យតែនិយាយត្រូវគ្នា នាងនឹងធ្វើការជាមួយបានភ្លាម ។ ថន លក្ខិណា បាននិយាយប្រាប់ LookingTODAY ថា បន្តិចទៀត តន្ត្រីរបស់ភេសជ្ជៈខារាប៉ាវ នឹងធ្វើ ការប្រគំតន្រ្តីទេសចរណ៍ទៀតហើយ រួមទាំងចាក់ផ្សាយ លើកញ្ចក់ទូរទស្សន៍ហង្សមាសទៀតផង ។ ថន លក្ខិណា នឹងទទួលបានតំណែង ជាពិធីការនីដដែល មិនផ្លាស់ប្ដូរឡើយ ។ ទាក់ទងនឹងការបង្ហាញមុខនៅហង្សមាស គេអាចនឹងសង្ស័យថា នាងត្រូវវេចបង្វិចមកហង្សមាស ជាទូរទស្សន៍ល្បីមួយឈានមុខ នាពេលបច្ចុប្បន្ន និងអាចក្លាយជា ទ្រនំរឹងមាំ ដែលអ្នកណាក៏ចង់ឈរ នៅទីនោះដែរ ។

ថន លក្ខិណា និយាយបញ្ជាក់បន្ថែមថា នាងមិនប្រកាន់ថា ខាងណាខាងណីទេ សំខាន់គឺធ្វើឲ្យទាំងអស់ ព្រោះខាងភេសជ្ជៈខារ៉ាបាវ ជាអ្នកចង់បាននាង មកធ្វើពិធីការិនី មិនមែនខាងស្ថានីយនោះទេ ។ នាងមិនមែនបុគ្គលិក ជាប់កុងត្រាដូចនេះ ធ្វើការងារខាងណាក៏បាន មិនរើសកាងារនោះឡើយ។

ថន លក្ខិណា ក៏ត្រូវបង្ហាញមុខមាត់ នៅប្រទេសថៃជាញឹកញាប់ តាមរយៈកម្មវិធីនានា ព្រោះអាច ប្រើប្រាស់ភាសាថៃបានល្អមិនចាញ់ អ្នកអាជីពឡើយ ហើយវាមានភាពងាយស្រួល ក្នុងការ ទំនាក់ទំនងគ្នា ទើបនាងហាក់មានទីផ្សារជាងតារាសម្ដែងដទៃ ដើម្បីស្វែងរកភាព ល្បីល្បាញ ពីប្រទេស ជិតខាង ដែលជាការបន្ថែមកេរ្តិ៍ឈ្មោះ មួយកម្រិតទៀត៕