ប្រទះឃើញ ខ្មោចសត្វចម្លែក លើឆ្នេរសមុទ្រ មិនដឹងជា សត្វអ្វីឲ្យប្រាកដ!

រុស្ស៊ី៖ មានការភ្ញាក់ផ្អើល យ៉ាងខ្លាំងមួយ នៅពេលដែល កងកម្លាំង ពិសេសរបស់ ប្រទេសរុស្ស៊ី បានប្រទះឃើញ គ្រោងឆ្អឺង សត្វមួយនៅក្នុង សមុទ្រដែល មានខ្លួនវែង ធ្មេញមុតស្រួច និង មានរោម នៅលើខ្លួន ទៀតផង ដែលមើលទៅ ពិតជាដូចជា សត្វចម្លែកម្យ៉ាង។

យោងតាមប្រភព ព័ត៌មាន បានឲ្យដឹងថា សាកសពសត្វ ចម្លែកនេះ ត្រូវបានប្រទះឃើញ នៅឯឆ្នេរសមុទ្រ មួយកន្លែង ក្នុងប្រទេសរុស្ស៊ី ដែលមានអ្នកវិទ្យាសាស្រ្ត ជាច្រើនកំពុង ចាប់អារម្មណ៍ ទៅលើវា និង ចង់ស្រាវជ្រាវ ថាតើវាជា ប្រភេទសត្វអ្វី ឲ្យប្រាកដ ព្រោះថាវាមាន លក្ខណៈខុសប្លែក ពីបណ្តា សត្វ ដែលរស់នៅ ក្នុងសមុទ្រ ដទៃទៀត ដោយថា វាមានសក់ និង រោម ហើយមានប្រវែង ដល់ទៅជាង ៦ម៉ែត្រ ឯណោះ។

ស្របពេលនេះដែរ ក៏មានការ លើកឡើង មួយចំនួនថា សត្វមួយនេះ អាចជាប្រភេទ សត្វក្រពើ ឬ ក្រពា ដែលរស់នៅ ក្នុងសមុទ្រ តែប៉ុណ្ណោះ រីឯមួយចំនួនទៀត ថានេះ អាចជា ប្រភេទភាវៈរស់ ដែលសល់តាំងពី បុរេប្រវត្តិ មកម្ល៉េះ។ តែយ៉ាងណាមិញ ក្រោយពីក្រុម អ្នកវិទ្យាសាស្រ្តបាន ធ្វើការវិភាគ ជាជំហានដំបូង ទៅលើសាកសព សត្វមួយនេះ និង បានបញ្ជាក់ថា “តាមរយៈគ្រោងឆ្អឹង យើងអាចសន្និដ្ឋាន បានថាសត្វប្រភេទនេះ អាចជាពូជសត្វ ត្រីបាឡែនស ដែលរស់នៅ ក្នុងសមុទ្រជម្រៅជ្រៅ តែក៏នៅមាន ចំណុចមួយចំនួន ដែលសត្វមួយ ក្បាលនេះមាន លក្ខណៈខុសប្លែក ពីត្រីបាឡែនស ផ្សេងៗទៀត ផងដែរ ហើយពេលនេះ យើងកំពុង តែសិក្សា ស្រាវជ្រាវបន្ថែម”។

គួរបញ្ជាក់ផងដែរថា នេះមិនមែនជា លើកទីមួយឡើយ ដែលមានការ ប្រទះឃើញសាកសព សត្វចម្លែក ដែលយើងមិន ធ្លាប់ឃើញពី មុនមក ដូចជាកាលពី ឆ្នាំមុន មានការប្រទះឃើញ សាកសពសត្វ សមុទ្រមួយ ដ៏ចម្លែក ដែលមានប្រវែង ៤ម៉ែត្រ និង មានដុះស្នែង នៅលើក្បាល នៅឯប្រទេស អេស្ប៉ាញ៕

បណ្តុំរូបភាពៈ សាកសពសត្វចម្លែក ដែលគេប្រទះឃើញ និងមិនដឹងថា ជាប្រភេទសត្វអ្វី ឲ្យប្រាកដ ៖

ប្រភព៖ ដេលីម៉េល

ដោយ៖ សុជាតិ

ខ្មែរឡូត