បើកម៉ូតូ មិនប្រយ័ត្ន ទៅបុករថយន្ត ដឹកស៊ីម៉ងត៍ ពីក្រោយ របួសធ្ងន់ ខ្លួនឯង

សាក្សីបានឃើញហេតុការណ៍ បានឱ្យដឹងថា មុនពេលកើតហេតុគេឃើញអ្នកបើកបរម៉ូតូ មួយគ្រឿងម៉ាក C125 ពណ៌ខ្មៅ សេរីឆ្នាំ២០១៤ គ្មានកញ្ចក់ គ្មានស្លាកលេខ ក្នុងគោលដៅពីលិចទៅកើត លុះមកដល់ ចំនុចកើត ហេតុស្រាប់តែ បើកទៅបុករថយន្ត ដឹកស៊ីម៉ងត៍ មួយគ្រឿងពាក់ ស្លាកលេខ កំពង់ចាម 3A-3215 ដែលចត ចោលនៅខាងស្តាំដៃ ពីខាងក្រោយយ៉ាងពេញទំហឹងតែម្តង បណ្តាលឱ្យម៉ូតូ ផ្នែកខាងមុខ ខូចខាត មួយកំណាត់ ចំណែក អ្នកបើកបរ រងរបួសធ្ងន់បែកក្បាលហូរឈាម សន្លប់ បាត់ស្មារតី ដោយ មិនដឹងថាស្លាប់ឬរស់ ហើយត្រូវរថយន្តអង្គការកាម៉ា មកដឹកទៅសង្គ្រោះបន្ទាន់ នៅមន្ទីពេទ្យបង្អែក ក្រុងប៉ោយប៉ែត។ ក្រោយពីកើតហេតុគេឃើញ មាន សមត្ថកិច្ចចរាចរចុះអន្តរាគមន៍ និងវាស់វែង។

សមត្ថកិច្ចចរាច បានឱ្យដឹងថា ជនរងគ្រោះជិះម៉ូតូ ទៅបុករថយន្តខាងក្រោយ មានឈ្មោះ ឃុន សុខាន់ ភេទប្រុស អាយុ ២៣ ឆ្នាំ មុខរបររត់ម៉ូតូឌុប រស់នៅក្នុងភូមិឃុំ កើត ហេតុខាងលើ ។ ចំណែកម្ចាស់រថយន្ត បានគេចខ្លួនបាត់ស្រមោល និងពុំដឹង អត្តសញ្ញាណនៅឡើយ។

ក្រោយពេលកើតហេតុសមត្ថកិច្ច បានយកទាំងម៉ូតូ និងរថយន្តទៅរក្សារទុកនៅអធិការដ្ឋាន ក្រុង ប៉ោយប៉ែត ដើម្បីរង់ចាំការដោះ ស្រាយ នៅពេលក្រោយ ៕