ក្មេងប្រុសអាយុ៥ឆ្នាំ ចេះដុតនំពងទា តែមិនអាចបរិភោគបាន គួរឲ្យអាណិត

ចំពោះអ្នកជំនាញដុតនំ ឬ ចុងភៅទាំងអស់ តែងតែភ្លក់នូវនំ ឬ ម្ហូបដែលពួកគេបានធ្វើរួច តែចំពោះអ្នកដុតនំវ័យក្មេង របស់យើងនេះវិញ គឺគេមិនដែលធ្លាប់បានភ្លក់ សូម្បីតែម្ដង ព្រោះគេមិនអាចបរិភោគអាហារបាន។

យោងតាមប្រភពព័ត៌មានបានឲ្យដឹងថា កុមារា Theo Carnie មានជំងឺដ៏ចម្លែកម្យ៉ាង ដែលមិនអាចបរិភោគអាហារបានឡើយ រាល់ចំណីទាំងឡាយ ត្រូវកិនឲ្យម៉ដ្ឋ និងដាក់ក្នុងកូនចានតូច បញ្ចូលទៅតាមបំពង់តូច ចូលទៅក្នុងក្រពះរបស់គេតែម្ដង។

យ៉ាងណាមិញ កាលពីសប្ដាហ៍មុននេះ គេបានប្រារព្ធធ្វើ ពិធីខួបកំណើត អាយុ៥ឆ្នាំដំបូងបង្អស់របស់គេ ដែលមាននំខួបចំនួនពីរ នំមួយគេបានធ្វើសំរាប់មិត្តភក្កិ និងក្រុមគ្រួសាររបស់គេ ហើយមួយទៀតគឺគេទុកជាវត្ថុ អនុស្សាវរីយសំរាប់ខ្លួនគេ។

Theo Carnie ចូលចិត្តធ្វើនំខ្លាំងណាស់ តែគួរឲ្យស្ដាយដែលគេមិនអាចភ្លក់ នូវនំដែលជាស្នាដៃរបស់គេបាន។ យោងតាមប្រភពព័ត៌មាន បានឲ្យដឹងថា កុមារា Theo បានបញ្ឈប់ឲ្យបរិភោគអាហារ តាំងពីគេអាយុ ៣ឆ្នាំមកម្ល៉េះ ព្រោះរាល់ពេលដែលគេបរិភោគអ្វីមួយ តែងតែក្អួតចេញមកវិញទាំងអស់ ហេតុដូចនេះហើយ ទើបក្រុមគ្រូពេទ្យសម្រេច ធ្វើការវះកាត់ដាក់បំពង់ទុយយ៉ូ មួយសំរាប់បញ្ជូនអាហារ ចូលទៅក្នុងក្រពះរបស់គេតែម្ដង។

តើប្រិយមិត្តយល់យ៉ាងណាចំពោះ ជំងឺដ៏ចម្លែករបស់ Theo? 

ប្រភព៖ Dailymail

កែសម្រួលដោយ តូម៉ាតូ

ខ្មែរឡូត