ក្រុមក្មេងទំនើងជិះម៉ូតូដេញវាយគ្នាបុករថយន្តសន្លប់ម្នាក់

អង្គារ ១២ មិថុនា, ២០១២ ម៉ោង ១១:១២

ក្រុងប៉ោយប៉ែត ៖ ក្មេងទំនើងម្នាក់សន្លប់ពេលជិះម៉ូតូបុករថយន្តលើដងផ្លូវជាតិ លេខ៥ក្នុងភូមិគីឡូម៉ែត្រលេខ៤ សង្កាត់ផ្សារកណ្តាល ។ ការជិះម៉ូតូបុករថយន្តនេះ នៅពេលពួកគេជិះម៉ូតូដេញវាយគ្នាកាលពីវេលាម៉ោងជាង៨ព្រឹកថ្ងៃ ទី៩ មិថុនា ។ ជនសន្លប់នោះឈ្មោះណានី បូរិន ភេទប្រុស អាយុ១៨ឆ្នាំ មានទីលំនៅក្នុងភូមិប្រជាធម្មកើត សង្កាត់ប៉ោយប៉ែត ។

ប្រភពព័ត៌មានពីកន្លែងកើតហេតុឱ្យដឹងថា ក្មេងទំនើង២ក្រុម ដោយមួយក្រុមៗមានគ្នា៦ទៅ៧នាក់ ជិះម៉ូតូដេញវាយគ្នាប្រសាចតាមដងផ្លូវជាតិពីលិចទៅកើត ។ ចំណែកម៉ូតូម៉ាកឌ្រីម សេ១២៥ របស់ជនដួលសន្លប់នោះ ដោយសារបើកគេចពីក្រុមម្ខាងដែលដេញតាមក៏ជ្រុលទៅបុក រថយន្តម៉ាកកាមរី ដែលកំពុងចតបណ្តាលឱ្យសន្លប់។

ប៉ូលិសចរាចរសណ្តាប់ធ្នាប់សាធារណៈក្រុងប៉ោយ ប៉ែត ដែលស្ថិតនៅកន្លែងកើតហេតុប្រាប់ថា ម៉ូតូនោះជិះគ្នា២នាក់ តែម្នាក់ទៀតពុំស្គាល់អត្តសញ្ញាណទេ បានទៅរកពេទ្យឈ្នួលដោយខ្លួនឯង នៅសល់តែជនសន្លប់ត្រូវប៉ូលិសហៅរថយន្តសង្គ្រោះរបស់អង្គការ Cama ដឹកទៅកាន់មន្ទីរពេទ្យបង្អែកក្រុង ។ មន្ត្រីប៉ូលិសប្រាប់ថា ចំពោះភាគីពាក់ព័ន្ធផ្សេងៗបានគេចទៅបាត់ ហើយទាំង២ក្រុមនោះ ជាក្រុមក្មេងទំនើង ៕

បញ្ចូលអត្ថបទ ៖ ស្រីណា កោះ

ផ្តល់សិទ្ធដោយ កោះសន្តិភាព